呢個宇宙有兩個最強：
第一個係《葉問》連環拳嘅丹爺。
第二個係《殺破狼》嘅狂野MMA丹爺。
自從呢兩個丹爺誕生之後，睇所有丹爺有份演出嘅電影，都會問「今次係葉問定殺破狼先！」
而最近睇咗套叫《大師兄》同樣有丹爺做嘅電影，原來宇宙最強…仲有第三個！
戲內完全搵唔到以往角色嘅影子，係一個全新丹爺。入場前我以為係打交版《流氓師表》，或者現實版《超級學校霸王》。
點知我都估錯晒，睇完套戲我呆咗好耐，一整個黑人問號…
我望一望四周圍，不禁自問點解會咁嘅？！搞乜啊？到底做緊乜嘢？
正如文章標題，我腦滿子都問號。但問題並不在乎電影，丹爺亦無任何問題。
真正嘅問題係…
究竟個社會發生咩事？點解我哋可以當無事發生咁生活落去？
《大師兄》甄子丹飾演一個曾經做過軍人嘅教師，叫陳俠。
阿陳生今次係打學生？定係一個打十個入侵學校嘅壞人？
唔係…佢摑醒晒成個社會所有人。
陳俠用最簡單直接方式話你知，個社會原來存在好多問題，教育制度、家長、老師、媒體、食花生心態…邊個先係兇手？
原來我哋全部人都係幫兇，我哋根本無認真思考過問題，只係將責任推畀其他人，任由問題繼續侵食社會。
非常喜歡電影對於社會問題嘅點到即止，亦無既定立場，唔會話你聽「你應該要咁做！」，留返畀觀眾去思考。
最深刻係丹爺同學生講嘅說話：「唔係要求你哋咩都識，但千祈唔可以咩都唔識，無判斷力，好容易畀人呃。」
望返而家網絡世界，「我都唔睇字嘅！」「我都唔理政治嘅！」「我都唔睇新聞！」
好多以無知為樂，活於自己世界嘅人。
更加多跟車太貼而炒晒車嘅人。
無知唔係錯，但唔經大腦思考就係愚蠢。
而愚蠢會令社會愈行愈錯。
今次丹爺唔係打壞人，而係打晒入場睇《大師兄》嘅觀眾。
為各位上咗一堂好好嘅通識課。
強烈建議大家入場睇一睇，支持港產片又好，支持丹爺又好，絕對唔會令大家失望。
因為你點都估唔到，睇丹爺嘅戲，會感動到流眼淚…
推薦指數：9.1顆橙
Search